Runa Simipi Manifiesto Occupy Wall Streetmanta

[Download PDF]

Wayqechasqa, allin kawsaypi huñunakuspa, ñoqayku munayku rimayta runamasinchis injusticiamanta; mana imata qonqaspa, llapan injusticiamanta munayku willakuyta. Ñoqayku rimashayku tukuy alqochasqa runakunaq sutinpi, corporacionkuna rayku alqochasqa runakunaq sutinpi; chay ñak’ariq runamasinchiskunata niyku:  yachaychis wayqepanaykuna,qankunawanmi kashayku, nispa

Huk runa hinalla, huñusqa, llapayku niyku: kawsayninchis rayku, llapanchis ayninakuna, hinallapipunin qhespirinqa derechonchiskunaqa; manachayqa lluy derechonchispas qollopunqa; Corporacionkuna atipawasunchis; paykuna mana kasunkuchu gobiernotapas ni pitapas; Pachamamanta, runakumanta sik’inku llapan atisqankuta, qolqerayku; chaychu kanman allin kawsay?, manamá. Chayrayku, ñoqayku rimaykushaykiku kunan, Corporacionkuna lluy runakunata alqochashaqtin.Chaymi kaypi, thakpi huñunakuspa, munayku rimayta, reqsichiyta derechonchiskunata.

Paykuna, Corporación runakuna,hap’ikapuranku wasinchista mana chaninta, millayta yukawaspanchis.

Paykuna qechunakunku, qolqenkupas kanman hina llapan impuestonchiskunata, chay mana kutichiwasqanchis qolqeta yapayunku directorkunaq sueldonman

Paykunataq cheqniwanchis; qolqewan kallpachasqa t’akawanchis, ch’eqechiwanchis; qarqowanchis llank’anakunamanta machupaya kaqtinchis, hoqniraq kaqtinchis, manapaykuna hina kaqtinchis.Paykunataq manachaninta usuchishanku, ch’usaqyachishanku tukuy tarpuykunatapas, chakrakunata hap’ikapushanku, rakinakushanku paykunapura.

Paykunan ñak’arichiwanchis,laqha ukhupi kawsachiwanchis; paykunataq ñak’arparinku uywanchiskunatapas, pakallapi lluytapas q’otopunku.

Paykunataq pisiyachishanku llank’aqkunaq salarionkunata, paykuna mana hunt’asqatachu pagashanku empleadonkunaman, ichaqa llank’achiwanchis mana samachispa.

Paykunataq estudiantekunatapas manuyachinku, wakchayachinku estudio rayku, ichaqa educacionqa manan rantinachu, derechonchismi.

Paykuna ch’usaqyachishanku llank’anata, mana pagayta munaspa,llank’aqkunaq onqoyninkunata mana hanpiyta munaspa.

Paykunataq llusinku qolqewan juezkunatapas leykunata pantachinankupaq, mana Corporacionkunata carcelman winanankupaq.

Paykunataq chhaytukuy qolqeta gastayushanku abogadokunata llank’achispa,laqla rimayninkuwan derechonchista chinkachinankupaq.

Paykunataq munachishanku allin kawsayninchista rantinapas kanman hina.

Paykunataq soldadokunatapas, policiakunatas kamachishanku qatipayawananchispaq, mana pipas uyariwanachispaq, mana rimananchispaq.

Paykuna raykutaq lluy rurukunapas onqoywan poqoshan.

Paykunataq mana allinta tupachispa llaqtakunaq economíantapas qolloyman apayushanku.

Paykunataq raqrachishanku politicokunatapas hunt’a hunt’a qolqewan, Corporacionkunata yanapanankupaq  mana allin leykunawan

Paykunataq pakapayashanku hoqniraq energiatapas asnaq petroleollawan llank’ananchispaq

Paykunataq chinkachishanku hanpinakunatapas, lluy qhaliyachiq medicinakunata; paykunaq medicinankunallawan qhaliyananchispaq, paykunallmanta rantinanchispaq.

Paykunataq sapa kutinpas usuchishanku asnaq petroleota mayukunapi, Mamaqochapi ima; paykuna wañuchinku runata accidentekunapi; qechunakunku wakchakunaq qolqenta.

Paykuna kikinku willawanchis noticiakunatapas llullakuspa, manchachiwanchis periodiconkunawan, televisionninkunawan ima.

Paykunataq chay khunku ñak’aqkunata kamachimunku carcelpi runakunata sipinankupaq, hinaña mana huchayoq kaqtinkupas

Paykuna kawsachiwashanchis kaypi,llapan llaqtakunapi ima, ñawpaq colonial tiempopi hina. Chaymi Corporacionkuna munayninta ruwaspa wañuchishanku runakunata qaru llatqkunapi

Paykuna, mana samaspa, ruwayushanku wañuchiq armakunata, gobiernokunaman vendenankupaq lluy guerrakunapi

Chayrayku Teqsimuyuntin runakunata niyku,

Ñoqayku, Nueva York llaqtapi, Liberty Square Wall Streetpi huñunakuqkuna niykiku qankunata, hatariychis, kallpachakuychis wayqepanaykuna

Thak sonqowan valechiychis derechoykichiskunata, huñunakuychis ñoqaykuwan kuska kay plazapi; Corporacionkunaq ñawpanpi rimaychis, kuska allichana kay problemakunata

Lluy llaqtakunata, llapan runakuna huñunakuqkunata ñoqayku yanapasaqku imaymanapi, mana ni huktapas sapallanta saqesaqkuchu.

Huñunakuychis ñoqaykuwan rimaynichis uyarikunanpaq